الاثنين، 13 فبراير 2012

انا رجعت تاني

السلام عليكم ورحمة الله وبركاته...والله والله وحشتوني جدا وسوري لو كنت اتأخرت عليكم بس انا النهاردة جايبالكو موضوع تحففففففففففة...


  الايام الاخيرة كنت بدور على حاجة كويسة اكتبها لاني مش بحب احط اي موضوع وخلاص المهم موضوع النهاردة بيتكلم عن طريقة من طرق الكسب من الانترنت .. قريت عنها وبدأت فيها وربنا يوفق ان شاء الله ..


  الموضوع بيتكلم عن شركة استثمارية على الانترنت اول ما بتعمل تسجيل ف الموقع بتساعدك ب 10$ و ال 10$ دي بتشتري بيها سهم والسهم بيعمل ارباح وكمان تقدرو تسحبو فلوس النت دي لازم يكون عندكم حساب ف بنك الكتروني..بسيطة هتسجلو ف موقع أليرتباي من اللينك ده :



ودلوقتي فكرة برنامج الشركة  كالتالي :


تشتري سهم و عدد الاسهم يتناسب طردياً مع معدل الربح اى ان كلما زاد عدد الاسهم كلما زاد معدل ربحك
سعر السهم : 10$
العائد اليومى (للسهم) : 2% × 10$ = 2. $
بمعنى ان العائد الشهرى : 60% = 6$

ولكن انتظر:دورة السهم الواحد 75 يومأ وليس 30 يوما مما يعنى ان السهم الواحد يعطيك 2.×75 =15$

استراتيجية للمبتدئين :

استثمر 40$ لشراء 4 اسهم وبعد 75 يوم تحصل انت على 60 دولار
2. للسهم × 4(عدد الاسهم) × 75 يوم = 60
ثم تحصل على سهم مجانى يعطيك بدوره 60$ اخرى بعد 75 يوم
مما يعنى 60+60=120 ولهذا يسمى Tripler

ملحوظة (كل 4 اسهم يكملوا 75 يوما تحصل انت على سهم مجانى)

عائد الاسهم يضاف بطريقة يومية اي انك تجد فى حسابك 2.على كل سهم يومياً
فبالتالى يمكنك شراء سهم جديد كلما اكملت 10$ فى حسابك اى انك اذا كان لديك 4 اسهم تستطيع شراء سهم جديد كل 13 يوم تقريبا

اما الطريقة المجانية :
ان تقوم بشراء سهم بالـ 10$ المجانية التى حصلت عليها عند تسجيلك
فيمكنك شراء سهم جديد بعد 50يوم
2.×50 = $10
ثم ولمدة 25 يوماً سيكون دخلك 4. يوميا فتشترى السهم الثالث
وهكذا الى ان تكمل 4 اسهم لتحصل على السهم المجانى الذى يعطيك 60$ كما ذكرنا ، قد يستغرق هذا وقت يصل الى 4 اشهر.


ايضاً يمكنك الربح من الريفيرال اذا اردت لتربح 10% من المستوى الاول و 5% من المستوى الثانى 
وعشان تسجل ف موقع الشركة دي دوس عاللينك ده :


هتعمل تسجيل شوف الصورة : 






وبعد كدة هتحط بياناتك وعادي Gmail او yahoo مش هتفرق :




وهتعمل تفعيل من الايميل بإنك تدوس على اللينك هيجيلك وهيفتحلك الصفحة دي :








وبعد كدة هتكمل كاللآتي :




بعد كدة هيوصلك كود هيكون هو اسم دخولك للموقع مع لينك الموقع هتدوس هتدخل للصفحة الرئيسية ف الموقع وهتختار المربع ده :




بعد كدة هتملا البيانات تاني :


بكدة هيكون معاك 10$ :

 بالرصيد ده هتقدر تشتري سهم بالاختيار ده :



هتكتب سهم 1 بس لانك معاك 10$ بس وكل يوم هتاخد 0.2$ وبعد 75 يوم هيبقى معاك 10 دولار تقدر تشتري سهم تاني والحد الادنى للسحب هو 20$ : 



وعشان تشوف ارباحك عاملة ايه هتدوس على كلمة positions زي اللي في الصورة بس ماتستعجلش كل حاجة بتحتاج وقت :



والموضوع مش هزار يعني كل اللي محتاجه شوية صبر وجرب احنا مش خسرانين وخير ان شاء الله .. وبس كدة
ادعولي بقى عشان مزعلش منكو :$ 
واشوفكو بإذن الله ف موضوع جديد ويارب ده يكون عجبكو زي ما عجبني..بالتوفيق للجميع !!

الأربعاء، 1 فبراير 2012

!!no comment!!

انا عايزة افهم حاجة واحدة بس عشان لو حكينا مش هنخلص واظن كلنا عارفين الحقيقة فين....هو كل ده ليه ولصالح مين ؟؟

يعني عمالين يخربو ف بلدنا اللي هي المفروض بلدهم والله اعلم !!

يااااه يا مصر..ده انتي عايزة انتفاضة ! احنا بنبني مصر من اول وجديد يا جماعة وربنا يساعدنا

انا زعلانة اوي وكان نفسي اقول حاجة مفيدة بس بجد مش عارفة اقول ايه، عموما..كل اللي هقوله حاجتين : حسبي الله ونعم الوكيل في اللي كان السبب، واللهم اسكن شهدائنا فسيح جناتك يارب وصبر اهلهم..اللهم امين
السلام عليكم ورحمة والله وبركاته..

اتكلمت امبارح على الاهداف والامل والتغيير bla bla bla..!!
 بس قلت ابدأ بقى اعمل حاجة من اللي انا اتكلمت عليها ..

 فكرت اني اعمل مشروع اساور للايد اللي هي بالمصري "حظاظات" ومن غير ما اتعلم من حد علمت نفسي من النت وصورتلكو كذا واحدة عملتها امبارح والنهاردة شوفوها انا فرحانة اوي اني عملتها بصراحة وكل شوية بفرجها لحد :D:D







والواحدة على 5 جنيه وقلبي يا مدام :D

ياريت لو حد عنده افكار ينتج ويشاركنا وممكن يعرضها هنا عالمدونة واشوفكو الحلقة الجاية.....هتوحشوني :$

الثلاثاء، 31 يناير 2012

باك

انا جيت تاني بصو بقى......

     انا النهاردة صحيت من النوم متحمسة اوي اني افتح مدونتي الجديدة عشان اشوف هل في تقدم او لا، المهم يعني المدونة لسة جديدة ولسة شوية عليها فأنا جاية بقى اتكلم معاكم ف حاجة مهمة ولكل شاب وبنت مكتئبين كالعادة وده الطبيعي، بذمتكو مين فينا بيصحى من النوم الا وهو كاره نفسه وعيشته ومش عارف هيستغل يومه ازاي ده كله زائد الحالة المادية الجميلة اللي بنعيشها " بجد ازمة !!" 

     انا طول مانا قاعدة عمالة افكر وادور عالنت على اي حاجة تنفعني ماديا وف نفس الوقت تفيدني علميا، من الاخر انا زهقت وكل ما ادخل موقع بلاقي مواضيع وكلها كلام انشا منقول من موقع للتاني مع التغييرات البسيطة ده اذا كان في تغييرات يعني، اكيد في مواضيع متميزة بس يعني مش بتتلاقى بسهولة..ما علينا

    انا مشيت بمبدأ ان ف كل الاحوال احنا عايشين ف ليه مش نعيش مبسوطين؟؟
الفعل صعب انا عارفة انه كله كلام بيتقال وشعارات بس انا شخصيا جربت تكنيك كان دكتور ابراهيم الفقي ربنا يمسيه بالخير قال عليه " تقول انا => يتبعها الشعور بالحالة اللي عايز تكون عليها => وبعدين نفس عميق" ومبروك عليك انت اتبرمجت!
اضرب مثال عشان الناس تفهمني : انا زهقانة النهاردة ... يبقى خلاص برمجت نفسي على اني زهقانة لو جربتها هتلاقيها سهلة ولو مبسوط حتى هتزهق نفسك من مجرد انك قلت الكلمة دي لو حاسسها، بس لو في حاجة مضايقاك وفعلا مخنوق وزهقان قول انا فرحان وافتكر وانت بتقول انا فرحان حاجة فعلا كانت بتفرحك او حتى هدف نفسك تحققه واتخيل نفسه فعلا حققته وكرر " انا فرحان ،بجد انا فرحان" وقولها بكل يقين انك كدة فعلا هتلاقي حالتك اتبدلت تماما ان شاء الله.

    انا مش داخلة اتكلم ف تنمية بشرية بس بجد الانسان ده طاقة هائلة وكللللللللللللللل انسان ف الدنيا جواه موهبة من عند ربنا متميز فيها ومستني بس انه يخرجها انت ناجح مهما كان حتى لو ناقصك الامكانيات خليك مصر على هدفك وافشل اكتر من مرة هتنجح ف الاخر دي قاعدة..هتنجح يعني هتنجح بإذن الله، خلي الجملة دي لمبة منورة قدامك منورة طول الوقت ف الضلمة او النور.

    تخيل بقى وانت مزاجك عالي كدة وحالتك المزاجية عالية ونفسك مفتوحة بس مش عارف تبدأ ازاي وقدامك حاجة انت مش واخد بالك منها..حاجة بين ايديك بس انت مش مركز معاها او ماتعودتش تستغلها...........العالم كله بين ايديك "الانترنت"، عايز تتعلم اي حاجة اوعى تقول مش معايا فلوس، اوعى تقول مابحبش احتك بالناس او اتعامل معاهم، اوعى تبرر لنفسك بحجة ف جميع الاحوال، احنا اخدنا فكرة عن التعليم غلط اصلا بس انت مش واخد بالك ان كل معلومة صغيرة بتفرق "مثلا لو بتاخد كورس انجليش وحفظت كلمة واحدة بس جديدة، كلمة x كلمة x كلمة = آلاف الكلمات = لغة جديدة " شوف بقى هتنفعك ف كام شغلة تزود دخلك وشوف كام فايدة هتطلع بيها، وان شاء الله انا هبقى جمبكم ف الموضوع ده وهوريكم نماذج كتير شخصية وهتعرفو انا بتكلم على ايه.

    انت المسؤول الوحيد عن نفسك، واللي عايز يكون هيكون وافتكر دايما انك حاجة كبيرة اوي، ليك الحق انك تعبر عن مشاعرك وافكارك وتكون مؤمن بيها حتى لو العالم كله وقف قدامك.

رغاية اوي انا ايه ده كله؟!

   المهم انا بجد نفسي كلنا نبقى ناجحين ونفسي الامة العربية كلها تبقى متقدمة ده احنا الاصل يا كبير والله بس جار علينا الزمن..ان شاء الله كل حاجة تبقى تمام وفلة.

Brb ;)





الاثنين، 30 يناير 2012

السلام عليكم ورحمة الله وبركاته..


 احب ارحب بيكم يا جماعة ف مدونتي " آه يا قلبي !! " 


   المدونة بكل بساطة بتتناول مواقف من الحياة اليومية ممكن انا او انت او انتي نتعرضلها، عموما الإنسان يوميا بتواجهه مواقف كتيييييير واكيد في مننا اللي بيستفيد منها وفي اللي مبيطلعش منها بأي حاجة, والمدونة دي عبارة عن " كتاب حياتي يا عين " كل يوم هيعدي بيساوي صفحة جديدة ف المدونة بيساوي تجربة وخبرة........


    انا مؤمنة ان المدونة دي بإذن الله هتكون مرجع مفيد وشيق، لانها هتكون متنوعة بتتناول مواضيع كتير تندرج كلها تحت عنوان رئيسي الا وهو " حياتنا " بما تحمله من فرح، حزن، امل، فشل، اهداف.......إلخ.



   وفي النهاية اتمنى اني اكون وصلت فكرة ملمة عن محتوى المدونة وان شاء الله الناس تستفيد، حتى على الاقل تبقى مدخل للفكاهة او نوع من انواع الترويح عن النفس ويارب يارب ابقى ضيفة خفيفة على قلبكو ونعيش مع بعض ايامنا كلها على صفحات.....
" آه يا قلبي !! "

هشوفكو قريب ان شاء الله استنوني ..